I siop y gair I cyhoeddiadu'r gair I dolenni defnyddiol I catalog I ffurflenni I hafan I

A oes gyda chi neu rywun yn eich eglwys neu ysgol Sul amser ac awydd i gynorthwyoyn achlysurol gyda rai agweddau o waith y Cyngor Ysgolion Sul?

Ers sefydlu Cyngor Ysgolion Sul yn 1966 y mae ei waith wedi datblygu a chynyddu yn sylweddol iawn, yn arbennig efallai yn ystod y blynyddoedd diwethaf, gyda nifer o ddatblygiadau newydd yn cymryd lle. Mae’r angen a’r galw am wasanaeth Cyngor Ysgolion Sul yn fwy nag erioed, ond gyda’r cyfyngiadau ariannol presennol, mae’n anodd cyflawni’r holl ddisgwyliadau sydd arnom. Mae ein rhaglen waith yn cael ei gyfyngu gan brinder amser ein swyddogion, a byddai cymorth gweinyddol ymarferol yn caniatau iddynt hwy fedru cyflawni mwy o waith maes allan o’r swyddfa gydag ysgolion Sul. Rydym yn gofidio bod cymaint o’i hamser yn gorfod cael ei roi ar gyflawni tasgiau gweinyddol, ac un ffordd o oresgyn hyn yw gofyn i gyfeillion yr achos am gymorth gwirfoddol o bryd i’w gilydd. Byddai rhai oriau yma ac acw, neu cymorth ar gyfer rhai gweithgareddau penodol yn medru gwneud cymaint o wahaniaeth.

Y mae amrywiaeth o dasgiau lle gallai cymorth gan wirfoddolwyr wneud gwahaniaeth mawr:
> Rhoi taflenni mewn amlenni a gwaith gweinyddol cyffelyb
> Paratoi posteri a fyddai‘n cynnwys lluniau o weithgareddau’r Cyngor
> Paratoi cwestiynau ar faes llafur Cwis Beiblaidd Cyngor Ysgolion Sul
> Cynorthwyo gyda dyfarnu pêl droed / pêl rwyd yng nghystadlaethau chwaraeon y Cyngor Ysgolion Sul
> Cynorthwyo gyda gwaith y babell yn ystod yr Eisteddfodau cenedlaethol
> Cyfieithu a golygu llyfrau Cristnogol neu paratoi deunydd gwreiddiol
> Cynorthwyo yn y siop ym Mangor neu ar stondin y Cyngor mewn arddangosfeydd llyfrau
Mae peth o’r gwaith yn waith tymhorol i’w gyflawnu mewn lleoliad arbennig e.e. maes yr eisteddfod neu ganolfan chwaraeon, tra mae agweddau eraill yn waith y gellir ei gyflawni o adref, neu o’r swyddfa ym Mangor neu Caerfyrddin, fel mae amser yn caniatau. Byddai Cyngor Ysgolion Sul yn barod i dalu costau teithio i wirfoddolwyr.

Ein nod yn syml yw cryfhau a datblygu gwaith yr ysgol Sul yng Nghymru heddiw - fe allwch chi chwarae eich rhan yn y gwaith pwysig hwnnw.
Os ydych mewn sefyllfa i gynnig cymorth, buaswn yn falch o glywed gennych. Am wybodaeth pellach neu am ffurflen “Gweithiwr Gwirfoddol” dylid cysylltu gyda mi drwy ffonio (01766)819120 neu ar e-bost: aled.davies@bangor.ac.uk)

“Gwyddoch nad yw eich llafur yn yr Arglwydd yn ofer.” (1 Cor. 15:58)